Як асобныя святары і афіцэры на Гродзеншчыне рыхтуюць жаўнераў "рускага свету"

Пад патранажам праваслаўнай царквы ў Беларусі дзейнічаюць сумнеўныя "вайскова-патрыятычныя" клубы для моладзі



Інструктары "Казацкага спасу" (першае фота) злева направа: Пятро Зубацкі, Пятро Шапко, Сяргей Зубацкі. Праваруч — лейтэнант міліцыі Дзяніс Мішкель. За спінаю Сяргея Зубацкага — маёр міліцыі Павал Найда.

 

Вось, з аўтаматамі, Сяргей і Пятро Зубацкія — магчыма, браты


Абодва яны не хаваюць сваіх поглядаў — іх старонкі Укантакце заваленыя імперскімі і маскалёўскімі сцягамі, тэкстамі ў падтрымку баевікоў Данбаса. І картамі, дзе Беларусь пазначаная часткаю Расеі.

Яны падпісаныя на суполку "Белоруссія Северо-Западный край Россіі", якая ўжо сваёй назваю цягне на крымінальны артыкул за заклікі да ліквідацыі Беларусі як дзяржавы. Кантэнт гэтай суполкі складаюць беларусаненавісніцкія тэксты.

"Пазняк, Шушкевіч і Лука-ка для мяне ў адным шэрагу — усе яны незалежнікі недаробленыя", — піша адзін з сяброў гэтай суполкі.

Іншы разважае пра беларускую мову: "Як часта вы карыстаецеся гэтым га.ном"?

 

Пятро Зубацкі адказвае, што "сапсаванай палякамі рускай мовай? Ніколі!".

Сяргей Зубацкі ж расказвае сваім сябрам пра тое, што дарма Лука-ка "захапляецца ліцвінізмам" і што нібыта беларусы Гомельшчыны і Магілёўшчыны "воўкам вылі", калі іх "гвалтоўна" далучалі да БССР у 1926 року.

Словам, Зубацкія — патэнцыйныя сепаратысты, якія таго і не хаваюць.


Інструктары


А вось мы бачым Зубацкіх на фота сярод падлеткаў.

На некаторых дзецях — чорны берэт.

Гэта фота з палявых вучэнняў выхаванцаў клубаў "Славяне" і "Дружына" — гэтак званых "праваслаўных вайскова­патрыятычных" клубаў Гродзенскай епархіі.

Зубацкія тут — інструктары, якія прадстаўляюць структуру "Казацкі спас".

Мы сталі разбірацца, хто яшчэ з дарослых на гэтых фотах. І былі шакаваныя, калі выявілі прынамсі двух афіцэраў міліцыі.


Чаму ў Гродне?


Гродзеншчына — самы каталіцкі рэгіён Беларусі. Доля праваслаўных вернікаў тут меншая, чым у іншых абласцях. Але менавіта Гродзенская епархія лідзіруе ў іншым — актыўнасцю ў стварэнні гэтак званых "вайскова-патрыятычных" клубаў.У вобласці іх дзейнічае аж пяць.

Гэта "Дружына" пры храме Богаяўлення ў Шчучыне, "Славяне" пры Свята­Пакроўскім кафедральным саборы Гродна, "Віцязі" пры Свята-Уладзімірскай царкве ў Гродне, "Белая Русь" пры храме Святога дабраславёнага князя Аляксандра Неўскага ў вёсцы Верцялішкі і клуб "Братэрства" пры храме ў гонар Сабора Усіх Беларускіх Святых горада Гродна.

Акрамя Гродна, праваслаўныя вайскова-патрыятычныя клубы зафіксаваныя ў Віцебску, Слоніме, Брэсце, Тураве, Беразіне, Магілёве, Гомелі, Полацку, Бабруйску. Усяго іх 14.

Мы мірная, спакойная краіна. Ніякіх пагроз праваслаўю няма, у краіне ўжо сотні гадоў не было ніякай міжрэлігійнай варожасці. Нашто праваслаўным ваенізаваная падрыхтоўка?

"Наша Ніва" датэлефанавалася да протаіерэя Яўгена Павельчука, які ў Гродзенскай епархіі адказны за супрацу з вайсковымі структурамі і з'яўляецца заснавальнікам "Славян" і "Дружыны". Першы раз, пачуўшы, адкуль яму тэлефануюць, Яўген сказаў "до свіданія", але пасля таго, як яму пазванілі з прэс­службы епархіі, усё ж пагадзіўся пагаварыць.

— Мы вучым дзяцей патрыятызму, патрыятызму беларускаму, — сказаў Павяльчук, — і калі вы ацэньваеце гэтую працу толькі па карцінках у Інтэрнэце, то гэта не правільна. Трэба ведаць працу клубаў знутры. Нам крыўдна, што вы вінаваціце нас у тым, у чым мы не вінаватыя. Мы рыхтуем веруючых грамадзян Беларусі.

На пытанне, ці не бачыць ён пагрозы беларускаму патрыятызму ў тым, што з дзецьмі займаюцца адкрытыя маскалёўскія шавіністы, Павяльчук сказаў, што такога няма, і абвінаваціў нас у хлусні. Аднак змяніў тон, калі мы прыгадалі яму фотасправаздачы, змешчаныя на сайце арганізацыі "Казацкі спас".

— Ну было, так, яны [інструктары Шапко] адзін раз бралі ўдзел у палявым выхадзе, і што? Не бачу абсалютна нічога адмоўнага, — сказаў Павяльчук.


"Вырасцеце воінамі Хрыста"


У мілітарызаваныя суполкі набіраюць збольшага "цяжкіх", агрэсіўных падлеткаў. Дзеці 4 разы на тыдзень наведваюць заняткі, дзе з імі праводзяць духоўныя гутаркі, але таксама вучаць рукапашнаму бою, стральбе з аўтаматаў і пісталетаў, навыкам выжывання, асновам медычнай дапамогі.

Непаўналетніх сяброў гэтых "клубаў" больш за 100 чалавек.

Адзін-два разы на месяц дзеці разам з інструктарамі выпраўляюцца ў лес, каб праверыць тэорыю на практыцы — пад выбухі штучных гранат яны гуляюць у страйкбол і адпрацоўваюць паводзіны ў баявых сітуацыях.

— Мы чакаем плёну, спадзяёмся, што ўсе вы вырасцеце годнымі воінамі Хрыста, — такія словы благачыннага Шчучынскай акругі іерэя Аляксандра Пастарняка на адрас кадэтаў прыводзіць сайт Church.by. (на момант публікацыі спасылка не працавала і старонка захавалася толькі ў кэшы Google. Таму вось яшчэ і скрыншот).

 

Чорныя берэты


У "клубах" епархіі ёсць і свае званні, аналагічныя вайсковым, а таксама найвышэйшая форма прызнання здольнасцяў — права насіць "чорны берэт".

Каб атрымаць "чорны берэт", выхаванец г.зв. "вайскова­патрыятычнага" клуба мусіць прайсці выпрабаванні накшталт спрошчанай здачы на "крапавы": прабегчы 10 кіламетраў у поўнай выкладцы, прайсці паласу перашкодаў і адстаяць тры раўнды ў рукапашным баі з інструктарам.

Апроч таго, "чорныя берэты" бясплатна скачуць з парашутамі на базе Гродзенскага аэраклуба.

— Яны непаўналетнія, таму мы з іх грошай не бяром, мы ж бюджэтная арганізацыя, — сказалі "Нашай Ніве" ў аэраклубе.
 
Форма, харчаванне, пнеўматычная зброя — на ўтрыманне гэтых клубаў cыходзіць велізарная сума. Да прыкладу, кошт найтаннейшага патрыманага страйкбольнага аўтамата Калашнікава пачынаецца ад 120 даляраў.

Падчас прысягі дзеці клянуцца быць "вернымі чадамі Святой Рускай Праваслаўнай Царквы".

 

"Хто твае куміры?" — "Мікалай ІІ і Дзёмушкін"


Хто кіруе "Славянамі" і "Дружынай" — узгаданымі клубамі, на трэніроўкі якіх запрашаюць братоў Зубацкіх і іншых падобных "інструктараў"?

Клуб "Дружына" заснавалі святар Яўген Павяльчук і супрацоўнік Шчучынскага дэпартамента аховы Дзяніс Мішкель.

Потым протаіерэя Яўгена перавялі ў Гродна, дзе ён заснаваў яшчэ адзін клуб, "Славяне". Неўзабаве ў Гродна перабраўся і Дзяніс Мішкель, стаўшы адначасова і інструктарам новага клуба, і старшым інспектарам аддзялення ідэалагічнай работы Гродзенскага абласнога ўпраўлення дэпартамента аховы МУС.

Яшчэ адзін інструктар клуба "Дружына" начальнік аператыўна-­дзяжурнай службы Шчучынскага РАУС маёр міліцыі Павел Найда.

Хтосьці можа не адшукаць у гэтых клубах нічога кепскага. Усё ж фізічная нагрузка для падлеткаў. Але для чаго тыя маскалёўскія сцягі? Чаму няма папулярызацыі поспехаў нашай краіны — Беларусі, праслаўлення нашых герояў — беларускіх, ушанавання нашай сімволікі — нацыянальнай ці дзяр-жаўнай, каму як падабаецца?

"Хто твае куміры?" — пытаюцца ў аднаго з выхаванцаў Мішкеля на старонцы ў сацсетках. "Мікалай ІІ і Дзёмушкін", — адказвае хлопец. (Зміцер Дзёмушкін — маскалёўскі скінхэд, ідэолаг рускага нацыяналізму.).

Іншы хлопец змяшчае маскалёўскі імперскі сцяг на сваёй старонцы побач з уласнымі фотаздымкамі.

Хто заклаў такія ідэі ў галовы падлеткаў, якія яшчэ не скончылі і школы? 


І рэклама РНЕ


Адміністратары суполкі "Праваслаўных вайскова­патрыятычных клубаў Гродзенскай епархіі" Укантакце не саромеюцца выкладаць на сценцы суполкі маскалёўскія сцягі. А на інтэрнэт­старонцы клубаў "Славянін" і "Дружына", якімі кіруе лейтэнант-ідэолаг гродзенскай міліцыі Дзяніс Мішкель і маёр Найда, увогуле змешчаная рэклама… баевікоў РНЕ! У ёй добраахвотнікаў запрашаюць на вайну "ў абарону рускіх на тэрыторыі былой (!) Украіны".

Афіцыйнай беларускай сімволікі ў суполках няма ўвогуле.

Ад каго "спасаць" збіраюцца?

Зубацкія належаць да дарослай арганізацыі "Казацкі спас".

З кантэнту ў суполцы "Казацкага спасу" ў сацсетках вынікае, што гэтыя людзі проста прагнуць далучыцца да Расеі. Хоць арганізацыя падае сябе як "беларускіх казакоў", у іх суполцы толькі маскалёўскія і імперскія сцягі, да якіх далучаныя запісы накшталт "Мы рускія, з намі Бог".

На іх сайце з'яўляюцца і справаздачы аб удзеле сяброў "Казацкага спасу" ў маскоўскіх семінарах. 

Карэспандэнты "Нашай Нівы" яшчэ дзесяць гадоў таму, робячы журна-лісцкія расследаванні, назіралі, як на аналагічныя сустрэчы масава вазілі і будучых кіраўнікоў баевікоў Данбаса.

Дарэчы, кіраўнік "Казацкага спасу" Пятро Шапко — часты госць на ток-шоу Гігіна. Праўда, у Вадзіма Францавіча яго прэзентуюць не як "казака", а як кіраўніка ініцыятывы "Горад без наркотыкаў".


Адзіныя казакі ў беларускай гісторыі


У старадаўняй Беларусі казакоў ніколі не было, у даўнія часы яны былі ва Украіне, а нашы продкі лічылі іх бандзюгамі, якія сеюць хаос.

Адзіным мясцовым выключэннем сталі казакі палкоўніка Паклонскага на Магілёўшчыне, што ўзніклі пад уплывам казацтва Багдана Хмяльніцкага ў часе вялікіх войнаў Рэчы Паспалітай, Масковіі, Швецыі і Запарожскай Сечы у 1648-1667 роках. Спачатку яны дапамаглі маскоўскаму цару захапіць Магілёў, а калі раскусілі характар саюзнікаў, уначы перарэзалі маскалёўскі гарнізон да апошняга чалавека.

Хто такія сённяшнія "казакі"?

Сучасныя "казацкія" арганізацыі Беларусі - гэта сумнеўнага паходжання мілітарызаваныя суполкі. Іх некалькі: "Усебеларускае казацтва", "Нёманскае казацтва", "Казацкі спас" ды іншыя.

Ні адна з іх не мае дачынення да сапраўднага, гістарычнага казацтва. Але мэты найбольш радыкальных з іх мала розняцца ад мэт колішніх баевікоў РНЕ радыкальнай арганізацыі, дзейнасць якой беларускія спецслужбы спынілі ў сярэдзіне 2000-х.

 

Небяспечныя сувязі


Бачылі кадры з Данбаса, у што там ператварылі багаты край? Тое самае зробяць і з Беларуссю, калі мы будзем дурнямі.

Ці звязаныя нечым між сабой, акрамя ідэйнай блізкасці, кіраўнік "Казацкага спасу" Шапко і афіцэры беларускай міліцыі Мішкель і Найда? Ці гэта проста выпадковасць і магчымасць такім чынам "асвойваць" сродкі, што паступаюць ад няясных маскалёўскіх структур па каналах РПЦ? Мы не маем адказу на гэтае пытанне.

Дзяніс Мішкель падчас размовы з журналістам "Нашай Нiвы" сказаў толькі, што "не разумее, пра што ідзе гаворка", і кінуў трубку.

Калі беларускіх дзяцей у 10 рокаў аддаюць на "выхаванне" інструктарам, якія не прызнаюць беларусаў за нацыю, якія былі б рады ліквідацыі Беларусі як дзяржавы, то што гэта калі не бомба запаволенага дзеяння? Прыкра, што гэтаму свядома ці несвядома спрыяюць і асобныя праваслаўныя святары, і дзейсныя супрацоўнікі беларускай міліцыі.

 

Арцём Гарбацэвіч

 

"Наша Нiва", 2 лістапада 2015 р.



Обновлен 16 мая 2016. Создан 26 фев 2016



  Комментарии       
Имя или Email


При указании email на него будут отправляться ответы
Как имя будет использована первая часть email до @
Сам email нигде не отображается!
Зарегистрируйтесь, чтобы писать под своим ником

Flag Counter